Dangerous Manila

1 07 2006

Ang Maynila ay isang higanteng garbage bag. Wala pa akong dalawang linggo sa trabaho sari-saring sakit na ang naglabasan sa pribadong parte ng katawan ko. Parang may tinatayong barangay ng hadhad, at an-an sa likod ko. May tatay na butlig , nanay butlig, kambal butlig, kapitbahay na butlig. ‘Yung sa tabi pa ng kilikili ko sa kaliwa ay ang kabilang barangay na butlig. Talo ko pa ang pinakulam nito. Mahina ang paghinga ko na may kasamang paninikip. Dahil lang ‘yan sa nabasa ako ng ulan na naging baha sa ‘min at kailangan kong lumusong sa baha para makauwi.  

Umpisa na ng tag-ulan. May paparating daw na bagyo, Milenyo ang posibleng pangalan, katatapos lang kasi ng bagyong Luis. Kahapon umambon ulit ng konti. Nabasa na naman ako ng konti tapos nilagnat na ako. ‘Yung paa ko nangangati na at may bagong barangay ng bacteria na pausbong. Parang magkakabuni pa yata ako. Napakatoxic pala ang tubig baha dito. Pag may baha sa probinsiya, ayos lang ang lumusong sa baha at buhay ka pa pag umahon.

 

Para mabawasan ang palaging pagkakasakit, nagpaturok ako ng dalawang adult vaccine – isang anti flu saka anti typhoid fever.

Nagpacheck up din ako kanina sa school nurse ng BebeKo. Sabi may acute bronchitis daw ako. Ang sama pakinggan parang malalang sakit na bukas makalawa ihahatid nako sa hukay. Nakngtinapa, tagal ko ng nabubuhay dito sa mundo pumunta lang ako sa Maynila tapos kung anu-anong akyu-kyut daw akong sakit. Di ko pa nga naranasan maospital maliban sa pagkakatuli ko.

Pag humihinga ako parang may makina ng sasakyan na tumutunog sa baga ko. Pers taym ko ‘to. Di ko tuloy alam kung ‘worth it’ nga ba na nakipagsapalaran ako dito sa Maynila.